ढोल-ताशांच्या गजरात गणरायाचे आगमन; ‘बाप्पा मोरया’च्या जयघोषाने शहर दुमदुमले, बाजारपेठेतही रौनक
राजेंद्र मर्दाने
वरोरा : विघ्नहर्ता, मंगलमूर्ती श्री गणरायाच्या आगमनाने शहरातील वातावरण भक्तिमय झाले आहे. गणेश चतुर्थीच्या मंगल पर्वावर घराघरांत तसेच सार्वजनिक गणेश मंडळांमध्ये लाडक्या गणपती बाप्पाची विधिवत प्राणप्रतिष्ठा करण्यात आली. ‘गणपती बाप्पा मोरया, मंगलमूर्ती मोरया’च्या जयघोषाने शहरातील गल्लीबोळ दुमदुमून गेले असून, सर्वत्र उत्साह, श्रद्धा आणि चैतन्याची अनुभूती येत आहे.
गणरायाच्या स्वागतासाठी गेल्या अनेक दिवसांपासून सुरू असलेल्या तयारीला आता उत्सवाचे स्वरूप आले आहे. सार्वजनिक गणेश मंडळांनी आकर्षक मंडप, विद्युत रोषणाई, फुलांची आरास आणि विविध सामाजिक संदेश देणारे देखावे साकारले आहेत. घरगुती गणपतींसाठीही नागरिकांनी आकर्षक सजावट केली असून, बाप्पाच्या आगमनावेळी अनेक ठिकाणी ढोल-ताशांचा गजर आणि फटाक्यांची आतषबाजी करण्यात आली.
बाप्पाच्या चरणी भक्तांचे साकडे
गणपती बाप्पाच्या दर्शनासाठी सकाळपासूनच भाविकांची लगबग सुरू झाली. महिलांनी पारंपरिक पद्धतीने पूजा-अर्चा करून बाप्पाला मोदकांचा नैवेद्य दाखविला. युवक, महिला आणि बालगोपाळांमध्येही गणेशोत्सवाचा विशेष उत्साह दिसून येत आहे. ‘बाप्पा, सर्वांच्या आयुष्यात सुख-समृद्धी नांदू दे, संकटे दूर कर आणि प्रत्येकाच्या मनोकामना पूर्ण कर’, अशी प्रार्थना करीत भाविकांनी गणरायाच्या चरणी साकडे घातले. शेतकऱ्यांना भरघोस उत्पन्न मिळावे, विद्यार्थ्यांना यश मिळावे, नागरिकांचे आरोग्य उत्तम राहावे आणि शहरासह संपूर्ण समाजात शांतता व बंधुभाव कायम राहावा, अशी भावना भक्तांनी व्यक्त केली.
बाजारपेठेत खरेदीसाठी गर्दी
गणेशोत्सवामुळे शहरातील बाजारपेठेलाही झळाळी आली आहे. गणेशमूर्ती, फुले, हार, पूजेचे साहित्य, आकर्षक सजावटीच्या वस्तू, विद्युत माळा, तोरणे, रंगीबेरंगी कापड तसेच नैवेद्यासाठी लागणाऱ्या साहित्याच्या खरेदीसाठी नागरिकांची मोठी गर्दी होत आहे. गणेशमूर्तींच्या दुकानांपासून ते फुलांच्या आणि मिठाईच्या दुकानांपर्यंत सर्वत्र ग्राहकांची वर्दळ वाढली आहे. विशेषतः लहान मुलांमध्ये बाप्पाच्या आगमनाचा उत्साह ओसंडून वाहताना दिसत असून, आपल्या आवडीची गणेशमूर्ती निवडण्यासाठी मुले पालकांसोबत बाजारपेठेत येत आहेत.
सामाजिक उपक्रमांनाही प्राधान्य
गणेशोत्सव हा केवळ धार्मिक उत्सव न राहता सामाजिक एकोपा आणि जनजागृतीचा उत्सव व्हावा, यासाठी विविध गणेश मंडळांकडून सामाजिक, सांस्कृतिक आणि जनजागृतीपर उपक्रमांचे आयोजन करण्यात आले आहे.
दरम्यान, गणेशोत्सव शांततेत आणि उत्साहपूर्ण वातावरणात पार पडावा, यासाठी प्रशासन व पोलिस यंत्रणेकडून आवश्यक उपाययोजना करण्यात आल्या आहेत. नागरिकांनी पर्यावरणपूरक गणेशोत्सव साजरा करावा, ध्वनिप्रदूषण टाळावे आणि प्रशासनाने दिलेल्या सूचनांचे पालन करावे, असे आवाहन करण्यात आले आहे.
:गणरायाच्या आगमनाने शहरात भक्तीचा रंग चढला असून, पुढील दिवसांत विविध धार्मिक, सांस्कृतिक आणि सामाजिक कार्यक्रमांनी शहर आणखी गजबजणार आहे. ‘गणपती बाप्पा मोरया’च्या जयघोषात श्रद्धा, आनंद आणि सामाजिक एकतेचा हा उत्सव अधिकच रंगणार आहे.
